|
Երևանի քաղաքապետի թեկնածու Արծվիկ Մինասյան
|
|
|
|
|
Նորություններ
|
23.05.2009թ.
|
Սիրելի շրջանավարտներ
Ինչպես յուրաքանչյուր կյանք, այնպես էլ այդ կյանքի յուրաքանչյուր էջ իր ուրույն հմայքն ու խորհուրդն ունի: Եվ այդ էջերում պարուրված բովանդակությունն է, որ իմաստավորում է կյանքը: Իմաստնության այդ ճանապարհը սկսվում է դպրոցի շեմից, բայց չի ավարտվում այնտեղ: Եվ դպրոցն է այն դարբնոցը, որ կանխորոշում է մարդու կերպն ու ապագան:
Հայի համար կրթօջախը այն տեղն է, որտեղ կերտվում է հայի ինքնությունը: Մենք ակնհայտորեն գիտելիքի ազգ ենք և դա է, որպես անմնացորդ պատգամ, ժառանգվել հայոց մեծերից: Գիտելիքն է այն փարոսը, որ մղում է փառավոր հարատևման:
Դուք չեք մոռանա ձեր առաջին ուսուցչին, ձեր սիրելի ուսուցչին, ձեր դասարանը, ձեր առաջին սիրած էակին, որի հետ հաճախ նույն նստարանին եք նստել: Եվ չեք մոռանա դպրոցական պատերի ներսի այն մոգական միջավայրը, որը ձեզ մղել է կատարելու առաջին քայլը` դեպի գիտելիք, դեպի խիզախում, դեպի սեր, դեպի հարգանք ու հպարտություն: Կյանքում հնարավոր քայլերի զգալի մասը դուք արդեն առաջին անգամ կատարել եք դպրոցում: Եվ շատերդ հենց դպրոցում եք գիտակցել, որ ձեր սեփական ԵՍ-ից այն կողմ կան նաև շատ այլ արժեքներ, որոնք հասու կլինեն միայն այն դեպքում, երբ դպրոցի շեմից քայլեք ճիշտ և համարձակ ճանապարհով: Եվ տարբեր են այդ ճանապարհները և ոչ միշտ հարթ-ուղիղ, սակայն ձեր մեջ են այն մարդիկ, ովքեր պետք է առաջնորդեն Հայաստանն ու հայությանը 3-րդ հազարամյակում, և կերտեն հզոր մի երկիր` հպարտորեն քայլող քաղաքակրթության համաշքերթում: Դուք այսօր հրաժեշտ տալով դպրոցին և ձեր ուսուցիչներին, այսուհետ պետք է ինքնուրույնաբար կայացնեք ձեր կյանքի կարևորոգույն որոշումները: Բայց մի բան առանձնահատուկ պետք է գիտակցեք. ինչպիսի մղումներով դուք առաջնորդվեք, այդպիսին է լինելու վաղվա Հայաստանը: Եվ դպրոցը ավարտելու շնորհավորանքներիս հետ, մաղթում եմ, որ հայրենիքին անմնացորդ նվիրվելու մեջ գտնեք այն իմաստը, որը պետք է ձեզ առաջնորդի այսուհետ: Չկա ավելի վեհ գաղափար, քան հայրենասիրությունն է: Եվ իրական հայրենասիրությունն է, որ պակասում է այսօր մեր հոգիներում ու գործերում: Այդ պակասը դուք պետք է լրացնեք` ձեր հպարտ գործերով:
Բարի երթ դեպի նոր հորիզոններ և մեծ խիզախումներ:
Արծվիկ Մինասյան
Վերադարձ |
|
 |
|
